મધ્યપ્રદેશના સીધી જિલ્લામાં મામલતદારના કાર્યાલયમાં એક મહિલા અચાનક એક ભેંસ લઈને આવી પહોંચી. આ મહિલા તેના નામમાં ફેરફાર કરાવવા માગતી હતી અને આ પ્રક્રિયા માટે લાંચ તરીકે આપવાના તેની પાસે પૈસા નહોતા, માટે તેણે અધિકારીઓને કહ્યું કે લાંચરૂપે ભેંસ લઈ લો. આ મહિલાએ એવો આરોપ લગાવ્યો છે કે તેનું નામ બદલવા માટે અધિકારીઓ લાંચ માગી રહ્યા હતા.
અધિકારીઓએ ભેંસ પરત કરી અને તેમના પર લગાવવામાં આવેલા લાંચના આરોપોને પણ નકારી દીધા. અધિકારીઓએ જણાવ્યું કે તારીખ 14 નવેમ્બરના રોજ નામ બદલવાનું કામ થઈ ચૂક્યું છે અને આ મહિલા ભેંસ લઈને મામલતદારના કાર્યાલયમાં ઘૂસી આવી તે એક ષડયંત્ર છે. જ્યારે મહિલાનું કહેવું છે કે અધિકારીઓ મારી પાસે લાંચ સ્વરૂપે પૈસા માગી રહ્યા હતા.
રામકલી નામની આ મહિલાએ જણાવ્યું કે મેં મારી પૈતૃક સંપત્તિમાં નામ બદલવા માટેની અરજી કરી હતી. અધિકારીઓએ મારી પાસેથી રૂપિયા 10 હજારની લાંચ માગી, મેં રૂપિયા પણ આપ્યા તેમ છતાં હજુ સુધી મારું કામ થયું નથી. હવે અધિકારીઓ મારી પાસેથી ફરી વખત રૂપિયા માગી રહ્યા છે. હવે મારી પાસે પૈસા નથી એટલે અધિકારીઓ માટે ભેંસ લઈને આવી પહોંચી છું. બીજી બાજુ, મામલતદાર માઈકલ ટિર્કીએ એ વાતનો સ્વીકાર કર્યો કે રામકલી નામની આ મહિલા લાંચ આપવા માટે પોતાની ભેંસ લઈને કાર્યાલયમાં આવી પહોંચી હતી.
મામલતદારે વધુમાં જણાવ્યું કે કોઈએ પણ રામકલી નામની મહિલા પાસેથી લાંચ માગી નથી. તેમનો કેસ એસડીએમ કોર્ટમાં છે પણ તેમનું કામ તારીખ 14 નવેમ્બરે જ થઈ ચૂક્યું છે. મેં આ મહિલાને ઓર્ડરની કોપી પણ આપી દીધી છે. આ મહિલા કોઈ ષડયંત્ર રચી રહી છે, લાગે છે કે કોઈએ આ મહિલાને આ બાબતે ભડકાવી છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..
તમે અમને Twitter અને Telegram પર લાઇક અને ફોલો કરી શકો છો.