મુંબઈ ફોર્ટ વિસ્તારમાં વર્ષોથી લિકર શોપ ચલાવતા ગુજરાતી વેપારી અશોક પટેલ વટ સાથે ધંધો કરી જાણે છે. અત્યારસુધી કેટલાય લોકો તેમની દુકાન પર તોડ કરવાના આશયથી આવીને દાદાગીરી કરી ચૂક્યા છે, પણ અશોક પટેલે બધાને એવો પાઠ ભણાવ્યો છે કે એકેય તેમની લીકર શોપ પર ફરી પાછો દેખાયો નથી.
હજુ થોડા દિવસ પહેલા જ કેટલાક લોકો નેતા જેવા સફેદ કપડાં પહેરીને અશોક પટેલની દુકાનમાં ઘૂસી ગયા હતા. પોતાની ઓળખ એક રાજકીય પક્ષના કાર્યકરો તરીકે આપી તેમણે અશોક પટેલ પાસે લાઈસન્સ અને બીજા દસ્તાવેજ માગ્યા હતા. તે લોકો તો જતા રહ્યા, પણ થોડા સમયમાં તેમાંનો જ એક બીજો વ્યક્તિ આવ્યો અને તેણે અશોક પટેલ પાસેથી 7 લાખનો હપ્તો માગ્યો.
હોશિયાર વેપારી એવા અશોક પટેલે તેમના સ્ટાફને ઈશારો કરી દીધો અને પળવારમાં જ દુકાનને અંદરથી લોક કરી દેવાઈ. અશોકભાઈએ તરત જ પોલીસને ફોન કર્યો, અને મરિન ડ્રાઈવ પોલીસ તેમની લીકર શોપ પર આવી પહોંચી. પોલીસે તોડ કરવા આવેલા વ્યક્તિને ઝડપી લીધો, અને તેની સાથે રહેલા બીજા ત્રણ લોકો પણ લાંબો સમય સુધી બચી ના શક્યા.
આપને જાણીને કદાચ નવાઈ લાગશે કે અશોક પટેલ પાસેથી ગયા વર્ષે મુંબઈ ક્રાઈમ બ્રાંચના ઈન્સ્પેક્ટર આનંદ ભોઈરે 22 લાખ રુપિયાનો તોડ કર્યો હતો, પરંતુ હોશિયાર અશોકભાઈએ તેને રુપિયા લેતા રંગેહાથ પકડાવી દીધો હતો. અત્યારસુધી આ પાક્કા ગુજરાતી વેપારી 121 જેટલા તોડબાજોને પકડાવી ચૂક્યા છે.
છેલ્લા 25 વર્ષથી લીકર શોપ ચલાવતા અશોક પટેલ પાસે અત્યારસુધી સેલ્સ ટેક્સ, ઈન્કમ ટેક્સ, પોલીસવાળા, કોર્પોરેશનવાળા, ફાયરબ્રિગેડવાળા, રેલવે પ્રોટેક્શનવાળા, સ્મગલર્સ, ડ્રગ પેડલર્સ આ જ પ્રકારે તોડપાણી કરવા આવી ચૂક્યા છે, અને તે તમામને તેમણે જેલના સળીયા ગણતા કરી નાખ્યા છે. અત્યારસુધી તેમણે જે 121 લોકોને જેલભેગા કરાવ્યા છે તેમાંથી 35 તો સરકારી કર્મચારીઓ હતા.
મૂળ ભુજના અશોક પટેલનું કહેવું છે કે તેમને વિવિધ સરકારી એજન્સીઓ તરફથી 100વાર રોકડ ઈનામ અને સર્ટિફિકેટ મળી ચૂક્યા છે. તેઓ હંમેશા પોતાનો ટેક્સ સમયસર ચૂકવી દે છે અને ક્યારેય કોઈ ખોટું કામ નથી કરતા, જેથી તેમને કોઈનાથી ડર પણ નથી લાગતો. 2012નો એક કિસ્સો યાદ કરતા તેઓ કહે છે કે તેમણે ઈન્કમ ટેક્સ ડિપાર્ટમેન્ટને ટીપ આપીને પાંચ લાખનું ઈનામ મેળવ્યું હતું. તેઓ ખાસ ભણેલા નથી, પણ ટેક્નોલોજીનું સારું નોલેજ ધરાવે છે, જેના કારણે કોઈ તેમનાથી બચી નથી શકતું.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..
તમે અમને Twitter અને Telegram પર લાઇક અને ફોલો કરી શકો છો.
If you like our post than don’t forget to share with your friends..