રાજ્યભરમાં આફત બનીને આવેલા કોરોનાનો કહેર સતત વધી રહ્યો છે. અમદાવાદ સહિત રાજ્યની અનેક હોસ્પિટલોમાં દર્દીઓનો રાફડો ફાટ્યો છે. જેને કારણે હોસ્પિટલોમાં બેડની સાથે સાથે ઈન્જેક્શન પણ ખૂટી પડ્યા હોવાનું સામે આવ્યું છે. ત્યારે ઈન્જેક્શનની અછતને કારણે અમદાવાદની એક મહિલાનું મોત થયું હોવાની ઘટના પ્રકાશમાં આવી છે. મૃતક મહિલાના પરિવારે આક્ષેપ કર્યો કે, ડોક્ટરે ટોસિલિઝુમેબ ઈન્જેક્શન મેનેજ કરવા જણાવ્યું હતું, પરંતુ 4 કલાક તપાસ કર્યા બાદ પણ ના મળ્યું, જેના કારણે મહિલાનું મોત થઈ ગયું.
65 વર્ષીય મહિલાને ખાનગી હોસ્પિટલમાં દાખલ કરાયા હતા
મીડિયા રિપોર્ટ મુજબ શહેરની 65 વર્ષીય મહિલાને કોરોનાનો ચેપ લાગતા એક ખાનગી હોસ્પિટલમાં દાખલ કરવામાં આવ્યા હતા. જો કે, સારવાર દરમિયાન તેમની તબિયત વધારે ખરાબ થતાં ડોક્ટરે તેમના પુત્રને જણાવ્યું કે, ટોસિલિઝુમેબ ઈન્જેક્શન નહીં અપાય તો જીવને જોખમ થઈ શકે છે. જેથી દીકરો 65000 રૂપિયા લઈને શહેરની 10થી વધુ જગ્યાએ 4 કલાક સુધી રખડ્યો પરંતુ ઈન્જેક્શન ક્યાંય મળ્યું નહોતું.
ક્યાંય ઈન્જેક્શન ના મળતાં મોત થયું
પરિવારના એક સભ્યના જણાવ્યા અનુસાર ટોસિલિઝુમેબ ઈન્જેક્શનની કિંમત 40000 છે, પરંતુ એ માર્કેટમાં ઉપલબ્ધ નથી. 40 હજારના ઈન્જેક્શન માટે 65000 રૂપિયા ખર્ચ કરવા તૈયાર હતા તેમ છતાંય આ ઈન્જેક્શન ક્યાંય મળ્યું નહીં, જેના કારણે સ્વજન ગુમાવવા પડ્યા. જણાવી દઈએ કે, રેમડેસિવિર ઈન્જેક્શન માટે પણ લોકો પડાપડી કરી રહ્યા હોવાનું સામે આવ્યું છે. ઈન્જેક્શન ખરીદવા માટે ઝાયડસ હોસ્પિટલની બહાર લોકોની લાંબી લાઈનો જોવા મળી હતી.
હોસ્પિટલોમાં બેડ અને ઈન્જેક્શનની અછત
અમદાવાદમાં કોરોના સંક્રમણ ભયાવહ રીતે ફેલાઈ રહ્યું છે અને સાતેય ઝોનમાંથી દરરોજ નોંધાતા કેસનું પ્રમાણ વધીને એક હાજરને આંબવા આવ્યું છે. તેના પગલે સિવિલ, સોલા સિવિલ, એસવીપી તથા ખાનગી હોસ્પિટલોમાં કોરોનાના દર્દીઓ માટે બેડ ખૂટી પડ્યા છે. પરિસ્થિતિ એવી બની ગઈ છે કે, હોસ્પિટલોમાં 4500 બેડ કર્યા તો સામે દર્દીઓની સંખ્યા વધીને 3789 પર પહોંચી ગઈ છે. જેને ધ્યાનમાં રાખીને વધુ 19 ખાનગી હોસ્પિટલોને કોરોનાની સારવાર માટે મંજૂરી અપાઈ છે. આ ઉપરાંત કોરોના દર્દીને અપાતાં જીવનરક્ષક ઈન્જેક્શનનો જથ્થો પણ ખૂટી પડતાં કોરોનાના દર્દીઓના શ્વાસ તૂટે તેવી ગંભીર પરિસ્થિતિ સર્જાઈ છે.
લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..
તમે અમને Twitter અને Telegram પર લાઇક અને ફોલો કરી શકો છો.
If you like our post than don’t forget to share with your friends..