અમદાવાદમાં પતિએ પત્નીને બોસ સાથે સંબંધ બાંધવાનો આગ્રહ કર્યો, ના પાડી તો મારઝૂડ કરી અને તેમને ઘરે બોલાવીને બળાત્કાર કરાવ્યો

વેજલપુરમાં રહેતા 46 વર્ષીય મહિલાએ પતિના બોસ અને સહકર્મચારી સામે દુષ્કર્મનો આરોપ મૂક્યો છે. કથિત રીતે પતિના બોસ અને સહકર્મચારીએ મહિલા પર 2013થી 2020 દરમિયાન વારંવાર દુષ્કર્મ આચર્યું હતું. મહિલાની ફરિયાદ પ્રમાણે, તેના પતિ અને સહકર્મચારીની પત્નીએ ગુનામાં સાથ આપ્યો હતો. પીડિતાએ ગુરુવારે ફરિયાદ નોંધાવી છે.

વેજલપુર પોલીસ સ્ટેશનમાં નોંધાવાયેલી ફરિયાદ મુજબ, મહિલાએ આશરે 22 વર્ષ પહેલા લગ્ન કર્યા હતા અને તેના બે સંતાનો છે જેમની ઉંમર 21 અને 19 વર્ષ છે. 2012માં મહિલાના પતિને અમદાવાદમાં નોકરી મળતાં તેઓ વતન કેરળથી વેજલપુર રહેવા આવ્યા હતા. નોકરી મળ્યા પછી મહિલાનો પતિ અવારનવાર તેના બોસ અને સહકર્મચારીઓને ઘરે ડિનર અને ગેટ-ટુ-ગેધર માટે બોલાવતો હતો.

મહિલાના જણાવ્યા મુજબ, તેના પતિએ એકવાર તેને કહ્યું હતું કે, તેના બોસ અને સહકર્મચારી તેની સાથે શરીર સંબંધ બાંધવા માગે છે અને તેણે તેમની વાત માનવી પડશે. જ્યારે મહિલાએ પતિની આ વાત માનવાનો ઈનકાર કર્યો ત્યારે તેણે મારઝૂડ કરી હતી.

પીડિતાએ જણાવ્યું કે, તેના પતિએ બોસ અને સહકર્મચારીને સપ્ટેમ્બર 2013માં ઘરે ડિનર માટે બોલાવ્યા હતા. એ વખતે સહકર્મચારીની પત્ની પણ સાથે આવી હતી. પીડિતાના પતિ અને સહકર્મચારીની પત્નીએ કથિત રીતે મહિલાને ધક્કો મારીને નીચે પાડી હતી. જે બાદ બોસ અને સહકર્મચારીએ તેના પર દુષ્કર્મ આચર્યું હતું. આ ઘટના તેના ઘરે જ બની હતી. ફરિયાદમાં મહિલાએ આક્ષેપ કર્યો છે કે, ત્યારથી 2020 સુધી વારંવાર બોસ અને સહકર્મચારીએ તેની સાથે બળાત્કાર કર્યો હતો.

મહિલાએ કેરળમાં રહેતી તેની ફ્રેન્ડના ઘરે આશરો લીધો હતો. બાદમાં પરિવારના સભ્યો અને ફ્રેન્ડ સાથે મળીને પીડિતાએ પોલીસ ફરિયાદ કરી હતી. વેજલપુર પોલીસે મહિલાના પતિ, તેના બોસ, સહકર્મચારી અને તેની પત્ની સામે બળાત્કાર અને ગુનામાં સાથ આપવાનો ગુનો નોંધ્યો છે.

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..