જુનું વાહન ખરીદનારા પાસેથી આરટીઓ ફરી ટેક્સ વસુલી ન શકે: ગુજરાત હાઈકોર્ટ

જુનું વાહન ખરીદનારા પાસેથી આરટીઓ ફરી ટેક્સ વસૂલી ન શકે. ગુજરાત હાઈકોર્ટે પોતાના એક આદેશમાં જણાવ્યું છે કે અગાઉના માલિકે વાહનનો લાઈફટાઈમ ટેક્સ પહેલાથી જ ભરી દીધો હોય છે. તેવામાં આરટીઓ ફરી તે જ વાહન માટે ટેક્સ વસૂલી શકે નહીં.

એક અરજદાર દ્વારા હાઈકોર્ટમાં આરટીઓ દ્વારા જુના વાહનને ખરીદનારા પાસેથી વ્હીકલ ટેક્સ માગવા અંગે રિટ કરવામાં આવી હતી. જેના પર સુનાવણી હાથ ધરતાં જસ્ટિસ જેબી પારડીવાલા અને જસ્ટિસ ડીબી કારિયાની બેંચે ગયા સપ્તાહે આપેલા આદેશમાં આમ જણાવ્યું હતું.

સમગ્ર કેસની વિગત એવી છે કે, 2009માં સુરતના સતીષ નાઈકા દ્વારા એચડીએફસી બેંકની લોન પર એક કાર ખરીદવામાં આવી હતી. નાકિયા લોનના હપ્તા ન ભરી શકતા તેમણે કાર બેંકને સરેન્ડર કરી દીધી હતી. આ કાર ભાવેશ ઢોલા નામના વ્યક્તિએ બેંક પાસેથી ખરીદી હતી. આરટીઓમાં આ કારને તેમણે પોતાના ભાઈ વિજય ઢોલાના નામ પર ટ્રાન્સફર કરાવવી હતી.

આ અંગે જ્યારે આરટીઓમાં અરજી કરવામાં આવી ત્યારે સુરત આરટીઓએ ગાડી પર લાઈફટાઈમ ટેક્સ ફરી ભરવા જણાવ્યું હતું. અધિકારીઓનો દાવો હતો કે બેંક દ્વારા ગાડીની લિલામી કરાઈ છે, અને તેને ખરીદનારાએ આજીવન વ્હીકલ ટેક્સ ફરીથી ભરવો જ પડે. જેની સામે 2011માં ઢોલાએ હાઈકોર્ટમાં રીટ કરી હતી. તે વખતે વચગાળાનો આદેશ આપતા કોર્ટે તેમને તે પૈસા ડિપોઝિટ કરવા કહ્યું હતું, અને આરટીઓને ગાડી તેમના નામે ટ્રાન્સફર કરવાનો આદેશ આપ્યો હતો.

આ દરમિયાન યુઝ્ડ કાર ડિલર્સ અસોસિયેશન પણ ઢોલાના આ કેસમાં જોડાઈ ગયું હતું. કયા કાયદા હેઠળ આરટીઓ દ્વારા જુના વાહન પર ફરી આજીવન ટેક્સ માગવામાં આવે છે તેવો સવાલ તેમના દ્વારા કરવામાં આવ્યો હતો. હાઈકોર્ટે આ અંગે જણાવ્યું હતું કે, સરકાર લાઈફટાઈમ ટેક્સ સિવાય જુના વાહનની ખરીદી પર લાગતો ટેક્સ વસૂલી શકે છે.

તાજેતરમાં જ જસ્ટિસ જેબી પારડીવાલા અને જસ્ટિસ કારિયાએ જણાવ્યું હતું કે, બેંક દ્વારા વાહનની હરાજી કરાઈ હોવાથી તેને ખરીદનારાએ ફરી આજીવન ટેક્સ ભરવો પડે તેવી સરકારની દલીલથી કોર્ટ સહમત નથી. ગુજરાતના અને કેન્દ્રના મોટર વ્હીકલ્સ એક્ટ પર ચર્ચા કરતા કોર્ટે કહ્યું હતું કે, આવા કોઈ કાયદાનો કોર્ટમાં સંદર્ભ પણ નથી અપાયો. જેથી, જે વાહન પર લાઈફટાઈમ ટેક્સ પહેલથી જ ભરાઈ ચૂક્યો છે, તેને સેકન્ડ હેન્ડમાં ખરીદનારા વ્યક્તિએ ફરી તે જ ટેક્સ ભરવાનો રહેતો નથી.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..