જન્મદિવસે જ શહીદ થયો આર્મી જવાન, લગ્ન કર્યાના 16 દિવસની અંદર જ જવાન શહીદ થતાં નવોઢા પર આભ ફાટ્યું

રાજસ્થાનના ભરતપુરમાં રહેતા 22 વર્ષના સૌરભ કટારા આર્મીની 28મી રાષ્ટ્રીય રાયફલમાં ફરજ પર હતા અને તેમની ડ્યૂટી જમ્મુ-કાશ્મીરના કુપવાડામાં હતી. મંગળવારે રાત્રે બોમ્બ બ્લાસ્ટમાં તેઓ શહીદ થઈ ગયા. શહીદ સૌરભ કટારાના લગ્ન આ વર્ષે 8 ડિસેમ્બરે જ થયા હતા. લગ્ન કર્યા બાદ તેઓ 16 ડિસેમ્બરે ડ્યૂટી પર પરત કુપવાડા પહોંચ્યા હતા. બર્થડે પર નવવધુ પોતાના પતિને વિશ કરવા માગતી હતી પરંતુ તે જ દિવસે શહીદ થવાના સમાચાર મળ્યા.

શહીદ સૌરભ કટારાનો બુધવારે જન્મદિવસ પણ હતો. શહીદના પરિવારજનો અને નવવધુ જન્મદિવસની ઉજવણી કરવાની તૈયારી કરી રહ્યા હતા પરંતુ તેમને સમાચાર મળ્યાં કે સૌરભ બોમ્બ બ્લાસ્ટમાં શહીદ થઈ ગયા. શહીદ સૌરભ કટારાને અંતિમ વિદાય આપવા માટે હજારોની સંખ્યામાં લોકો ઉમટી પડ્યા હતા.

શહીદની નવવધુ પૂનમ દેવીની રડી રડીને હાલત ખરાબ થઈ ગઈ છે. તેઓ પણ પોતાના પતિને અંતિમ વિદાય આપવા માટે સ્મશાન પહોંચ્યા હતા. શહીદની પત્ની પૂનમ દેવીને કંઈ સમજમાં આવી રહ્યું નથી કેમ કે થોડા દિવસ પહેલા તેમના પતિ જલદી ઘરે આવવાની વાત કહીને ગયા હતા, હવે તેમનો મૃતદેહ પરત આવ્યો છે.

સૌરભ આર્મીથી રજા લઈને 20 નવેમ્બરે પોતાની બહેન દિવ્યાના લગ્નમાં સામેલ થવા આવ્યા હતા અને બાદમાં 8 ડિસેમ્બરે તેમના પણ લગ્ન થયા હતા. તેથી તેઓ બહેન અને પોતાના લગ્ન બાદ 16 ડિસેમ્બરે રજા પૂરા થતાં ડ્યૂટી પર પાછા ફર્યા હતા. સૌરભની પત્ની પૂનમ દેવીના હાથમાંથી હજુ મહેંદીના રંગ પણ નથી ઉતર્યો અને પતિ શહીદ થવાના સમાચાર આવ્યા.

શહીદ સૌરભ કટારાના પિતા નરેશ કટારા પણ આર્મીમાં હતા જે 2002માં નિવૃત થયા હતા. તેમણે 1999માં કારગિલ યુદ્ધમાં પણ ભાગ લીધો હતો. સાથે સૌરભનો મોટોભાઈ ગૌરવ કટારા ખેતી કરે છે અને નાનો ભાઈ અનૂપ કટારા એબીબીએસ કરી રહ્યો છે.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..