પશુ અને મનુષ્ય વચ્ચેની દોસ્તીનું અનોખું ઉદાહરણ: જેમના હાથે ઊંટ દરરોજ ખાવાનું ખાતું હતું તે પોલીસકર્મીનું મોત થતાં અન્નજળનો ત્યાગ કર્યો

માણસ અને પશુ વચ્ચેની દોસ્તી નિસ્વાર્થ અને પવિત્ર હોય છે. કૂતરાને હંમેશા માણસનો બેસ્ટ ફ્રેંડ ગણવામાં આવે છે. તમે અવારનાવર સાંભળ્યું હશે કે કૂતરાનો માલિક અથવા તેને ઘરમાં સૌથી વધુ ગમતી વ્યક્તિ ના હોય ત્યારે તે ઉદાસ રહે છે, ખાતો-પીતો નથી. પાળેલા પશુ અને તેના માલિક વચ્ચે પ્રેમ હોય તે સ્વાભાવિક છે પરંતુ ફરજ બજાવતા પશુ અને મનુષ્ય વચ્ચે આવો સંબંધ ભાગ્યે જ જોવા મળતો હશે. વાત કચ્છની છે. જખઉ પોલીસ સ્ટેશનના એક ઊંટે ખાવા-પીવાનું છોડી દીધું છે. ઊંટની સંભાળ રાખતા આસિસ્ટન્ટ સબ ઈન્સ્પેક્ટર શિવરાજ ગઢવીનું પિંગલેશ્વરમાં પેટ્રોલિંગ દરમિયાન હાર્ટ અટેકના કારણે મોત થયું. બસ ત્યારથી જ આ ઊંટે અન્નજળનો ત્યાગ કર્યો.

ઊંટ પર બેસીને કરતા હતા પેટ્રોલિંગ

જખઉ મરીન પોલીસ સ્ટેશનના ઈન્સ્પેક્ટર વી. કે. ખાંટે જણાવ્યું, શિવરાજ ગઢવી કચ્છના નલિયા પાસે આવેલા સિંઘોડી ગામના વતની હતા. લાંબા સમયથી તેઓ જખઉ પોલીસ સ્ટેશનમાં ફરજ પર હતા. શિવરાજ ગઢવી આ ઊંટ પર બેસીને બોર્ડર પર નિયમિતપણે પેટ્રોલિંગ કરવા જતા હતા અને જ્યારે રાજ્યમાં હાઈ અલર્ટ આપવામાં આવ્યું છે ત્યારે પેટ્રોલિંગ વધારી દીધું હતું.

પેટ્રોલિંગ ડ્યુટી દરમિયાન આવ્યો હાર્ટ અટેક

પોલીસ સૂત્રોએ જણાવ્યું કે, “56 વર્ષીય શિવરાજ ગઢવીને 24 જાન્યુઆરીએ પિંગલેશ્વરમાં પેટ્રોલિંગ ડ્યુટી આપવામાં આવી હતી. તેઓ લગભગ સવારે 9.30 વાગ્યે પેટ્રોલિંગવાળા વિસ્તારમાં ગયા. ત્યાં જઈને ઊંટને ખાવાનું ખવડાવ્યું અને થોડી જ ક્ષણોમાં ત્યાં જ ઢળી પડ્યા. તેમને કોઠારા લઈ જવામાં આવ્યા પણ તેમની તબિયત વધુ લથડતાં ડૉક્ટર્સે ભૂજ લઈ જવાનું કહ્યું. પરંતુ તેમનો દુખાવો વધતાં ભૂજ જતી વખતે 108 એમ્બ્યુલન્સ વચ્ચે જ એક ખાનગી હોસ્પિટલમાં રોકવી પડી. શિવરાજ ગઢવીએ ત્યાં અંતિમ શ્વાસ લીધા.”

ઊંટને આઘાતમાંથી બહાર લાવવા પ્રયાસ

શિવરાજ ગઢવીના મૃત્યુના સમાચાર સાંભળીને ગામ આખું શોકમાં ગરકાવ થયું. ઈન્સ્પેક્ટર ખાંટે કહ્યું, “શિવરાજ ગઢવીનું ફરજ દરમિયાન મૃત્યુ થતાં પોલીસ સમ્માન સાથે તેમના ગામમાં જ અંતિમ સંસ્કાર કરવામાં આવ્યા. શિવરાજ ગઢવી જખઉ પોલીસ સ્ટેશનમાં પરત ન આવતાં ઊંટે ખાવાપીવાનું છોડી દીધું છે. ઊંટ આ દુઃખમાંથી બહાર આવે તે માટે અમે પૂરતો પ્રયાસ કરી રહ્યા છીએ.”

અમારી પોસ્ટ મેળવવા સબસ્ક્રાઈબ કરો

આપનું ઈ-મેલ એડ્રેસ નીચે લખો અને તમામ પોસ્ટ તમારા ઈમેઈલ પર મેળવો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ અમારી એન્ડ્રોઇડ એપ્લિકેશન ડાઉનલોડ કરો:-
close