કોરોનાના ડરથી કોઈ આગળ ના આવતા મહિલા કોન્સ્ટેબલે આપ્યો મૃતકને અગ્નિદાહ

કોરોનાએ ફેલાવેલા ખૌફને કારણે બિનવારસી મૃતદેહના અંતિમ સંસ્કાર કરવામાં કોઈ આગળ ના આવતા એક મહિલા કોન્સ્ટેબલે જાતે જ તેને અગ્નિદાહ આપ્યો હતો. આ ઘટના યુપીના કોસી કલાન પોલીસ સ્ટેશનની છે, જે મથુરામાં આવેલું છે. જેમાં ફરજ બજાવતાં 25 વર્ષીય મહિલા કોન્સ્ટેબલ શાલિની વર્માએ કેનાલમાંથી મળેલી એક મહિલાની બિનવારસી લાશને અગ્નિદાહ આપ્યો હતો.

અત્યારસુધી કોઈ મહિલા કોન્સ્ટેબલે આવું કામ કર્યું હોય તેવું ક્યારેય નથી બન્યું. તેવામાં કોરોનાના ડર તેમજ સમાજમાં પ્રવર્તતી માન્યતાને કોરાણે મૂકી શાલિનીએ આ કામ કરી લોકોની વાહવાહી મેળવી છે. શાલિનીનું તો ત્યાં સુધી કહેવું છે કે તેમણે ભલે આ કામ જીવનમાં પહેલીવાર કર્યું હોય, પરંતુ ભવિષ્યમાં પણ જો આવી કોઈ સ્થિતિ સર્જાઈ તો તે ફરી આ કામ કરવા તૈયાર છે.

શાલિનીએ જણાવ્યું હતું કે, બિનવારસી મૃતદેહ સડી ગયો હતો, અને તેના અંતિમ સંસ્કાર કરવા માટે કોઈ આગળ ના આવતા તેમણે જ આ કામ કર્યું હતું. શાલિનીનું માનવું છે કે દરેક મૃતકની સમ્માનપૂર્વક અંતિમવિધિ થવી જોઈએ.

શાલિની સ્મશાનમાં મૃતકને અગ્નિદાહ આપી રહ્યા હતા ત્યારે ત્યાં ફરજ બજાવતા એક વ્યક્તિએ તેમને અટકાવવાનો પણ પ્રયાસ કર્યો હતો, પરંતુ તેની સાથે દલીલ કરીને શાલિનીએ તેને દૂર હટાવી દીધો હતો. શાલિનીએ જણાવ્યું હતું કે, તેઓ થોડા સમય પહેલા કોરોનાથી સંક્રમિત થયા હતા, જેના કારણે પણ તેમને મૃતકની અંતિમવિધિ કરવામાં કોઈ ડર નહોતો લાગ્યો.

એક તરફ કોરોનાકાળમાં ઘણા લોકો પોતાના પરિવારજનોના જ અંતિમ સંસ્કાર કરવામાં ડર અનુભવી રહ્યા છે, ત્યારે શાલિનીનું કહેવું છે કે તે આવું ક્યારેય નહીં કરે. ઈકોનોમિક્સમાં પોસ્ટ ગ્રેજ્યુએટ થયેલાં શાલિની માને છે કે આપણે આપણી સંકુચિત માનસિકતાને દૂર કરવાની ખૂબ જ જરુર છે. મહિલાઓ અગ્નિદાહ ના આપી શકે કે પછી સ્મશાનમાં ના જઈ શકે તેવી માન્યતા ખોટી છે. તેઓ જણાવે છે કે, ‘મેં પણ પુસ્તકો વાંચ્યા છે. મહિલાઓને સ્મશાનમાં જવાની મનાઈ માત્ર એટલા માટે કરાઈ હતી કે તેઓ ક્યાંક ડરી ના જાય. સિતાએ પણ રાજા દશરથનું ફાલ્ગુ નદીના કિનારે પિંડદાન કર્યું હતું તો મહિલાઓ અગ્નિદાહ કેમ ના આપી શકે?’

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..