65 વર્ષની વયે પરણવાની ઈચ્છા ધરાવતા જસદણના વૃદ્ધે 35 વર્ષની મહિલા સાથે શરીર સુખ માણ્યું, ભોગવવું પડ્યું ખતરનાક પરિણામ

65 વર્ષની વયે પરણવાની ઈચ્છા ધરાવતા જસદણના વૃદ્ધને પોતાનો જીવ ગુમાવવાનો વારો આવ્યો છે. અગાઉની બે પત્નીના મોત થયા બાદ વૃદ્ધ પોતાના પરિવારજનો તેમજ પરિચિતોને એકલતા સહન નથી થતી, કોઈ કન્યા હોય તો બતાવજો તેવી વાતો કરતા હતા. જમીન-મકાન સહિતની સંપત્તિ ધરાવતા આ વૃદ્ધને લગ્નની લાલચ આપીને 35 વર્ષની એક મહિલાએ તેમની સાથે પ્રેમસંબંધનું નાટક કર્યું હતું, અને આખરે મોકો મળતા જ પોતાના મળતિયા સાથે મળી તેમની ઘાતકી હત્યા કરી સોના-ચાંદીના દાગીના, 1.67 લાખ કેશ સહિતની મત્તાની લૂંટ ચલાવી હતી.

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

આ ઘટનાની વિગત કંઈક એવી છે કે, માવજીભાઈ નામના 65 વર્ષના વૃદ્ધ જસદણના દેવપરા ગામે આવેલી પોતાની વાડીમાં મકાન બનાવી એકલા જ રહેતા હતા. તેમની પહેલી પત્નીનું મોત થયા બાદ માવજીભાઈએ બીજા લગ્ન કર્યા હતા, પરંતુ બીજી પત્ની પણ ચાર-પાંચ વર્ષમાં મોતને ભેટી હતી. તેમનો દીકરો ગામમાં રહેતો હતો જ્યારે પરિણિત દીકરી સાસરીમાં રહેતી હતી. એકલા જ રહેતા માવજીભાઈ પોતાના માટે કન્યા શોધી રહ્યા હતા. ખેતર ઉપરાંત માવજીભાઈ પાસે બેલાની ખાણ પણ હતી. આ ઉપરાંત તેઓ વૈદવટુ પણ કરતા હતા અને ખાસ તો કોઈ દાઝી જાય તો તેને એક મલમ આપતા, જેનાથી વ્યક્તિ ઝડપથી સાજો થઈ જતો. તેના બદલામાં તેઓ પૈસા પણ નહોતા લેતા.
માવજીભાઈ કન્યા શોધી રહ્યા છે તે વાતની હનીટ્રેપ ગેંગ ચલાવતા અમરાપરના માનસીંગ નામના શખ્સને જાણ થઈ હતી. શરુઆતમાં માનસીંગ પોતાની એક સાગરિત પૂજા સોલંકી સાથે મૃતકને મળવા જતો હતો. ઘણીવાર પૂજા તેમને ત્યાં એકલી પણ આવતી-જતી હતી. આ દરમિયાન માનસીંગે તળાજાની એક યુવતીને માવજીભાઈ પાસે મોકલી હતી, અને બદલામાં તેમની પાસેથી બે લાખ રુપિયા પડાવ્યા હતા. જોકે, આ છોકરી 20-25 દિવસમાં માવજીભાઈની સાથે રહ્યા બાદ ભાગી ગઈ હતી.

આ વાતની જાણ પૂજાને થતાં તેણે ફરી માવજીભાઈના ઘરના ચક્કર મારવાનું શરુ કર્યું હતું. પોલીસના જણાવ્યા અનુસાર, પૂજા અને માવજીભાઈ શારીરિક સંબંધો પણ બાંધતા હતા. તેમની સાથેની વાતચીતમાં પૂજાને એક વાતનો તો ખ્યાલ આવી ગયો હતો કે વૃદ્ધ માવજીભાઈ પાસે ખૂબ જ પ્રોપર્ટી અને કેશ છે. આથી તેણે ગમે તેમ કરીને માવજીભાઈને પોતાના વશમાં કરી તેમની પાસે જે કંઈ હોય તે લૂંટી લેવાનો પ્લાન બનાવ્યો હતો.

પોતાની યોજનામાં પૂજાએ ભચાઉના આડોહી ગામની રાજલને પણ સામેલ કરી હતી. રાજલે આ વાત પોતાના પરિચિત અને મૂળ રાજસ્થાનના અમીતસિંગને કરી હતી. અમિતસિંગ અંજારમાં જ મિસ્ત્રીકામ કરતો હતો. તેને આ પ્લાનની જાણ કરાતા તેણે રાજસ્થાનથી બીજા ચાર લોકોને બોલાવી લીધા હતા. બધાએ ભેગા મળીને માવજીભાઈના ઘરે જઈ તેમને લૂંટી લેવાની યોજના બનાવી હતી, જે અનુસાર તેઓ 30મી જૂને રાત્રે બાર વાગ્યાની આસપાસ તેમની વાડીમાં પહોંચ્યા હતા.

તેમણે જઈને નિંદ્રાધિન અવસ્થામાં રહેલા માવજીભાઈના હાથ અને પગને બાંધી દીધા હતા. આ દરમિયાન માવજીભાઈએ અચાનક બૂમાબૂમ કરવાનું શરુ કરતાં તેમના મોઢામાં ડૂચો ભરી દેવાયો હતો, જેના કારણે શ્વાસ રુંધાઈ જતાં તેમનું થોડીવારમાં જ મોત થયું હતું. માવજીભાઈના મોત બાદ આ ગેંગે તેમના મકાનમાંથી જે કંઈ મળ્યું તે બધુંય લૂંટી લીધું હતું અને ત્યાંથી પોબારા ભણી ગઈ હતી.

માવજીભાઈના મર્ડર અંગે પોલીસને જાણ થતાં લોકલ ક્રાઈમ બ્રાંચે તેની તપાસ શરુ કરી હતી. જુદી-જુદી ટીમો બનાવીને આરોપીઓનું પગેરું મેળવવા માટે હાથ ધરાયેલા પ્રયાસોથી થોડા જ સમયમાં પોલીસના હાથમાં પૂજા સોલંકી તેમજ તેના કુલ સાત સાગરિતો આવી ગયા હતા. તમામે પોતાનો ગુનો કબૂલી લેતા જણાવ્યું હતું કે તેઓ ફુલપ્રુફ પ્લાન સાથે માવજીભાઈને લૂંટવા ગયા હતા. જો તેઓ સામનો કરે તો તેમને ત્યાં જ ઢાળી દેવા હથિયારો પણ સાથે રખાયા હતા. જોકે, તેની જરુર જ નહોતી પડી.

માવજીભાઈને ફસાવનારી પૂજાએ પોલીસને પૂછપરછ દરમિયાન સ્વીકાર્યું હતું કે તેણે માવજીભાઈ સાથે શારીરિક સંબંધ બાંધ્યો હતો. નવાઈની વાત એ છે કે, પૂજા સોલંકી ભૂતકાળમાં પણ હનીટ્રેપના કેટલાક કેસોમાં પકડાઈ ચૂકી છે. પોલીસનું માનવું છે કે, પૂજાનો ભોગ બનેલા ઘણા લોકોએ તો આબરું જવાના ડરે પોલીસ ફરિયાદ પણ નથી કરાવી. પૂજા સિવાયના બીજા આરોપીઓ પણ ગુનાઈત ભૂતકાળ ધરાવે છે.

ઉલ્લેખનીય છે કે, માવજીભાઈનું જે રીતે મર્ડર થયું તે જ રીતે જસદણના વીરનગર અને દેવપરામાં પણ એકલા રહેતા બે વૃદ્ધોની હત્યા થયાની ઘટના બની છે. આ બંને ગુના પોલીસે ઉકેલી લીધા છે, અને તેમાં સ્ત્રીપાત્રની જ સામેલગીરી હોવાનું બહાર આવ્યું છે. તેવામાં પોલીસે પણ એકલા રહેતા વૃદ્ધોને ચેતવણી આપી છે કે તેઓ કોઈપણ અજાણી સ્ત્રી પર વિશ્વાસ કરી તેની જાળમાં ના ફસાય, નહીંતર તેનું ગંભીર પરિણામ ભોગવવું પડી શકે છે.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..