યુવાઓ માટે આંખ ઉઘાડનારો કિસ્સો! અમદાવાદમાં યુવતી જેની સાથે લિવ-ઈનમાં રહેતી હતી તે યુવક પરિણીત અને એક બાળકનો પિતા નીકળ્યો!

જવાનીના જોશમાં ઘણીવાર વ્યક્તિથી ગંભીર ભૂલો થઈ જતી હોય છે, જે બાદ પસ્તાવો કરવા સિવાય કોઈ ઓપ્શન બાકી રહેતો નથી. શહેરમાં પણ આવો જ એક કિસ્સો સામે આવ્યો છે જેમાં પ્રેમમાં પડ્યા બાદ લિવ-ઈન રિલેશનશીપમાં રહેતી એક યુવતીનો કિસ્સો હાઈકોર્ટ સુધી પહોંચ્યો હતો. યુવતીને લાંબા સમય સુધી યુવક સાથે લિવ-ઈનમાં રહ્યા બાદમાં ખબર પડી કે તે તો પરિણીત છે અને એક બાળકનો પિતા છે. સમગ્ર હકીકત જાણમાં આવતા તે યુવકને છોડીને ચાલી ગઈ પરંતુ ત્યાં સુધીમાં તે પ્રેગ્નેટ થઈ ચૂકી હતી. યુવતી ઘર છોડીને જતી રહેતા યુવકે હાઈકોર્ટમાં હેબિયસ કોર્પસની અરજી કરી હતી પરંતુ યુવતીએ તેની સાથે જવાનો ઈનકાર કરી દીધો હતો.

આજના સમયમાં લિવ-ઈન રિલેશનશીપ જેવા કરારથી મોડર્ન વિચારધારા મુજબ રહેતા યુવાઓ માટે આ કિસ્સો લાલબત્તી સમાન છે. હાઈકોર્ટમાં નોંધાયેલા આદેશ મુજબ કેસની હકીકત એવી છે કે, યુવક અને યુવતી બંને 24 વર્ષના છે અને તેઓ બે વર્ષથી આસિસ્ટન્ટ પોસ્ટ માસ્ટરની નોકરી કરતા હતા. બંને એકબીજાના પ્રેમમાં પડ્યા અને લિવ-ઈન રિલેશનશીપમાં રહેવાનું શરૂ કર્યું. સાથે રહેતા બંનેના સંબંધો પણ બંધાયા અને યુવતી પ્રેગ્નેટ થઈ. જોકે બાદમાં યુવતી ઘર છોડીને જતી રહેતા યુવકે હાઈકોર્ટમાં અરજી કરી હતી કે યુવતીના પિતા તેને બળજબરીપૂર્વક લઈને જતા રહ્યા. ઉપરાંત યુવકને માર પણ માર્યો કારણ કે તેમના સંબંધથી તેઓ રાજી નહોતા.

બાદમાં આ યુવતીએ વડોદરા ફતેપુરા પોલીસ સમક્ષ નિવેદન આપ્યું હતું કે તે પોતાની મરજીથી યુવક સાથે રહેતી હતી અને તેના ગર્ભમાં બાળક પણ તેની જ ઈચ્છાથી છે. કેસમાં હાઈકોર્ટે નોટિસ પાઠવીને યુવતીને કોર્ટ સમક્ષ હાજર કરવાનો આદેશ કર્યો હતો. જેના આધારે યુવતીને હાજર કરવામાં આવી. યુવતીએ કોર્ટમાં જણાવ્યું કે, એક તબક્કે તે અરજદાર યુવક સાથે પ્રેમમાં હતી. પરંતુ તેણે લગ્નની અને બાળકની વાત છુપાવી. આ હકીકતથી યુવતી દુઃખી થઈ હતી અને તેની સાથે છેતરપિંડી થઈ છે. તેથી તેણે યુવકને છોડી દીધો અને માતા-પિતાના ઘરે આવી ગઈ. યુવક મારપીટનો જે દાવો કરી રહ્યો છે તે ખોટો છે.

હવે યુવતી યુવકનું મોઢું જોવા પણ નથી માગતી. બીજી તરફ યુવકે એવી રજૂઆત કરી હતી કે યુવતીને ડરાવવામાં આવી રહી છે, આથી તે આ પ્રકારનું નિવેદન આપી રહી છે. જોકે હાઈકોર્ટે પોતાના આદેશમાં નોંધ્યું કે, જ્યારે યુવતી જ યુવક સાથે રહેવા ન ઈચ્છતી હોય ત્યારે તે પોતાના માતા-પિતા સાથે રહી જ શકે છે. પોતાના આદેશ બાદ હાઈકોર્ટે રિટને રદ કરી હતી.

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..