સખી મંડળની બહેનોએ ટાયરમાંથી ટિપોઈ બનાવીને વેચી, હવે આ બચત મંડળ બન્યું ગુજરાતનું સર્વશ્રેષ્ઠ સખી મંડળ, આ મહિલાઓએ દેશભરમાં વગાડ્યો ડંકો
સમગ્ર વિશ્વમાં 8મી માર્ચે વિશ્વ મહિલા દિવસની ઉજવણી કરાઈ રહી છે. આ ઉજવણીના ભાગરૂપે 7 માર્ચે ગ્રામ વિકાસના કેન્દ્રીય મંત્રી નરેન્દ્રસિંહ તોમરના હસ્તે અમરેલી જિલ્લાના લાઠીના મતીરાળાની ‘સખીઓ’ને ગ્રામ વિકાસમાં ઉત્કૃષ્ટ યોગદાન બદલ પુરસ્કૃત કરવામાં આવી હતી. નેશનલ રૂરલ લાઈવલીહુડ મિશન (NRLM) અંતર્ગત સમગ્ર દેશમાંથી પસંદગી પામેલા 30 જેટલા સ્વ સહાય જૂથોમાંથી આખા ગુજરાતમાંથી એકમાત્ર મતીરાળાની બહેનોનું મંડળ પાંચમા ક્રમે આવ્યું હતું.
મતીરાળાની આ બહેનોને દિલ્હીના વિજ્ઞાન ભવન ખાતે યોજાયેલા કાર્યક્રમમાં પુરસ્કૃત કરવામાં આવી હતી. આ મંડળ સમગ્ર ગુજરાતના આશરે 2 લાખથી વધુ મંડળોમાંથી સર્વશ્રેષ્ઠ મંડળ તરીકે પસંદ કરાયું હતું. દસ બહેનોના સંગમ બચત મંડળના પ્રમુખ ઇન્દુબેન બોરસાણિયા જણાવ્યું હતું કે 2015માં મંડળની સ્થાપના થયા બાદ 2016માં રિવોલ્વીંન્ગ ફંડ તરીકે 10,000 રૂપિયા મળ્યા. જેના થકી કોઠી આઈસક્રીમના ગૃહ ઉદ્યોગની શરૂઆત કરી શક્યા.
તેઓ કહે છે, આ કામમાં સફળતા મળતા ગ્રામ સંગઠનમાં જોડાઈને રૂ. 50,000નું સી.આઈ.એફ. મેળવી વાહનોના જુના ટાયરમાંથી ટીપોઈ બનાવી ગુજરાતમાં ઘરે ઘરે મોકલતા થયા. પરિણામે હજારોની આવક થતા બેંકે અમારી ક્રેડિટ જોઈ વધુ રૂ. 50,000નું ધિરાણ આપ્યું. કોઠી આઇસક્રીમ અને ટીપોઈનો ગૃહ ઉદ્યોગ જાળવી રાખી મંડળના બીજા બહેનોને સિલાઈ કામ, ભરત-ગુંથણ જેવા કામો શીખવાડી મંડળને નવી દિશા આપી.
મંડળે આ રીતે આવક ઊભી કરીને બેંકને રૂ. 50,000 પરત આપ્યા. આજે મંડળ પાસે એક લાખ ઉપરની મૂડીની બચત છે. તેમજ તમામ સખીઓને નાની મોટી રકમ ધિરાણમાં આપેલી છે. આ ઉપરાંત મંડળના બહેનો આ મૂડી થકી આઈસક્રીમના ગૃહ ઉદ્યોગ માટે જરૂરી સાધનો, પશુપાલન માટે ભેંસો, સીવણ ઉદ્યોગ માટે સંચાની ખરીદી કરી આવક મેળવતા થયા છે.
10 બહેનોએ શરૂ કરેલા મંડળથી આજે ઘણી અન્ય બહેનોના ઘરમાં પૈસાની આવક થવા લાગી છે. તેમના પરિશ્રમ અને સરકારની યોજનાનો લાભ લઈને તેમણે આર્થિક રીતે ઘણા સમૃદ્ધ થઈ કુટુંબમાં માન-સન્માન મેળવ્યું છે.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..
તમે અમને Twitter અને Telegram પર લાઇક અને ફોલો કરી શકો છો.
If you like our post than don’t forget to share with your friends..