ઈટાલી પછી સ્પેનમાં પણ કોરોના વાયરસનો કહેરઃ એક દિવસમાં 700થી વધુ લોકોનાં થયા મોત

ચીનના વુહાનમાંથી ફેલાયેલા જીવલેણ કોરોના વાયરસે હવે યૂરોપને પોતાનો ગઢ બનાવી લીધો છે. ઈટાલીમાં હાહાકાર મચાવ્યા બાદ હવે તેના નિશાને સ્પેન છે. જ્યાં બુધવારે 700 કરતાં વધારે લોકોના મોત થયા હતા. બ્રિટેનના પ્રિન્સ ચાર્લ્સનો પણ કોરોના ટેસ્ટ પણ પોઝિટિવ આવ્યો છે.

સ્પેનમાં એક દિવસમાં 738 લોકોના મોત થતાં, ત્યાં કુલ મૃત્યુઆંક 3,434એ પહોંચ્યો છે. આ સાથે જ સ્પેને ચીનને પાછળ છોડી દીધું છે, જ્યાં કોરોના અત્યાર સુધીમાં 3,285 લોકોને ભરખી ગયો છે, તેમ સ્વાસ્થ્ય મંત્રાલયે જણાવ્યું. દેશમાં સંક્રમિતોની સંખ્યા 20 ટકાથી વધીને 47,610 પર પહોંચી છે જ્યારે 5 હજારથી વધુ સ્વસ્થ થયા છે. જોહ્નસ હોપકિન્સ યુનિવર્સિટીના જણાવ્યા પ્રમાણે વિશ્વભરમાં 4,35,000 લોકો કોરોનાથી સંક્રમિત છે જ્યારે 19 હજારથી વધુ લોકોના મોત થયા છે. તો 1,11,000 દર્દીઓ સાજા થયા છે.

સ્પેનના હેલ્થ ઈમરજન્સી કો-ઓર્ડીનેશન સેન્ટરના હેડ ફેર્નાન્ડો સિમોને ટૂંક સમયમાં સાજા થનારા દર્દીઓની સંખ્યા વધી જશે તેવી આશા વ્યક્ત કરી હતી. સ્પેનિશ મીડિયાના અહેવાલ પ્રમાણે, મેડ્રિડ રિટાયર્મન્ટ હોમમાં કોરોના વાયરસના કારણે 23 લોકો મૃત્યુ પામ્યા છે. સંક્રમિત 28 વૃદ્ધોને નર્સિંગ હોમમાંથી અન્ય હોસ્પિટલમાં લઈ જતી વખતે દક્ષિણ સ્પેનમાં પોલીસના કાફલા તેમજ એમ્બ્યુલન્સ પર પથ્થરમારો કરનાર બે શખ્સની પોલીસે ધરપકડ કરી હતી.

હોસ્પિટલો દર્દીઓથી ઉભરાઈ જતાં ત્યાંની હોટેલોને હોસ્પિટલોમાં કન્વર્ટ કરી દેવાઈ છે. આ સિવાય દેશમાં લોકડાઉન બે અઠવાડિયાનું વધારીને 12 એપ્રિલ સુધીનું કરાયું છે.

યૂરોપમાં ઈટાલીમાં સૌથી વધારે લોકો કોરોનાનો ભોગ બન્યા છે. જ્યાં 69,000થી વધુ સંક્રમિત છે જ્યારે 6,800 લોકોના મોત થયા છે. ઈટાલિયન ડોક્ટરો પણ કયા દર્દીને વેન્ટિલેટરની સખત જરૂર છે અને કોને નહીં તેની પસંદગી કરવા માટે મજબૂર બન્યા છે.

સાઉથ આફ્રિકામાં પણ કોરોના વાયરસના કેસ વધીને 709 પર પહોંચ્યા છે, જ્યાં શુક્રવારથી લોકડાઉન જાહેર કરી દેવાયું છે. જ્યારે રશિયામાં નવા 163 કેસ નોંધાયા. આ સાથે ત્યાં કુલ 658 કેસ થયા. રશિયાના વડાપ્રધાને ગંભીર પરિસ્થિતિ ઉભી થાય તો દર્દીઓને ઝડપથી સારવાર મળી રહે તે માટે હોસ્પિટલમાં વધારે બેડ તૈયાર રાખવાનું કહ્યું છે, તો રાષ્ટ્રપતિ પુતિને પણ પેનેડેમિકની સ્થિતિમાં મદદ કરવા માટે સેનાને ટ્રેનિંગ આપવાનો આદેશ આપ્યો છે.

ન્યૂઝીલેન્ડની સરકારે લોકડાઉન પહેલા ઈમરજન્સીની જાહેરાત કરી હતી. વડાપ્રધાને કહ્યું હતું કે, ‘હું ન્યૂઝીલેન્ડના નાગરિકોને એક સામાન્ય મેસેજ આપવા માગુ છું કે, આગામી 4 અઠવાડિયા મહત્વના છે. તેથી ઘરમાં જ રહો. તેનાથી જ બચી શકશો’.

પાકિસ્તાને પણ દેશમાં કોરોના વાયરસના 1 હજાર કેસ નોંધાયા બાદ તમામ ડોમેસ્ટિક ફ્લાઈટની ઉડાન પર રોક લગાવી દીધી છે. ઈરાનમાં પણ છેલ્લા 24 કલાકમાં 143 લોકોના મોત થતાં ત્યાં મૃત્યુઆંક વધીને 2,077એ પહોંચ્યો છે. ઈરાનના કેટલાક લોકો હજુ પણ આદેશોનું પાલન ન કરી રહ્યા હોવાથી સ્થિતિ વકરશે તેવી આશંકા સરકારના પ્રવક્તાએ વ્યક્ત કરી હતી.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..