સાવધાન! યોગ કરવાથી કોરોના ના થાય તેવી વાતોમાં ભરમાશો નહીં. 26 વર્ષની યોગા એક્સપર્ટ યુવતી બની કોરોનાનો શિકાર

કોરોના વાયરસ અમેરિકા જેવા સાધન-સંપન્ન દેશમાં પણ કહેર વર્તાવી રહ્યો છે, ત્યારે આપણા દેશમાં યોગ કરવાથી અને અમુક પ્રકારની વસ્તુઓ ખાવાથી કોરોના નથી થતો તેવા દાવા કરાય છે. જોકે, હકીકત એ છે કે આ વાયરસ એટલો ખતરનાક છે કે તે ગમે તેવા તંદુરસ્ત અને યુવાવયના લોકોને પણ આસાનીથી પોતાના શિકાર બનાવી શકે છે. કોરોનાનો ભોગ બનનારી ન્યૂયોર્કની એક 26 વર્ષની યોગા એક્સપર્ટ ફિઓના લોવેન્સ્ટિને પોતાનો અનુભવ વર્ણવતા જે લખ્યું છે તે ખરેખર વિચારવા જેવું અને અમલ કરવા જેવું છે.

26 વર્ષની ફિઓનાને નખમાં પણ રોગ નહોતો કે ના તો તેને બીજી કોઈ તકલીફ હતી. અઠવાડિયામાં છ દિવસ કામ કરતી ફિઓના પોતે યોગ શિખવે છે અને તેને કોઈ વ્યસન પણ નથી. તેને લાગ્યું કે હાલની સ્થિતિમાં તેને વૃદ્ધોની મદદ કરવી જોઈએ. આ વિચારીને તે પોતાના ઘરની બહાર નીકળી અને તેમાં જ તેને કોરોનાનો ચેપ લાગી ગયો.

13મી માર્ચે ફિઓનાએ નક્કી કર્યું કે હવે તે બીજા લોકોથી સોશિયલ ડિસ્ટન્સ જાળવી રાખશે, કારણકે આ તેના માટે જ નહીં, પરંતુ અન્ય લોકો માટે પણ જરુરી છે. તે દિવસથી જ તેને તાવ આવવાનો અને માથું દુ:ખવાનું શરુ થયું હતું. શરુઆતમાં તો તેને એમ જ હતું કે કદાચ તેને સામાન્ય શરદીની અસર થઈ ગઈ લાગે છે. જોકે, તેમ છતાંય તેણે પોતાના પાર્ટનરથી અલગ સૂવાનું નક્કી કર્યું. બે દિવસમાં તેને તાવ ઉતરી ગયો, અને તબિયત પણ ઘણી સારી થઈ ગઈ.

ફિઓનાને લાગ્યું કે કદાચ કોરોનાને કારણે પણ જો તેને તાવ આવ્યો હશે તો પણ હવે તેને ચિંતા કરવાની જરુર નથી. તે સોમવારથી પોતાનું કામ શરુ કરવાનનો પ્લાન કરી રહી હતી, અને બે દિવસથી ન્હાઈ ના હોવાથી તે શાવર લેવાનું પણ વિચારી રહી હતી. જોકે, તબિયત સુધરી ગઈ હોવા છતાં રવિવારે તેણે આખો દિવસ આરામ જ કર્યો. પરંતુ રાત્રે તેની સાથે ના થવાનું થયું. અડધી રાત્રે તે ઉઠી ગઈ, અને તેને જોરદાર ઠંડી ચઢી. તેને સતત ઉલ્ટીઓ થઈ રહી હતી અને શ્વાસ લેવામાં તકલીફ થવા લાગી.

સોમવારે તો તેની હાલત એવી થઈ ગઈ કે તેને બોલવામાં પણ શ્રમ પડતો હતો. શ્વાસ લેવા રીતસરની મહેનત કરવી પડતી હતી. બેડમાંથી ઉતરીને બાથરુમ સુધી જવામાં પણ તેને જાણે એક કિલોમીટર રનિંગ કર્યું હોય તેવો થાક લાગતો હતો.સોમવારે સાંજે તેણે કંઈક જમવાનો પ્રયાસ કર્યો, પરંતુ જમતી વખતે તે શ્વાસ જ નહોતી લઈ શકતી. ગણતરીના કલાકોમાં જ તેની હાલત એવી થઈ ગઈ કે તે ડોક્ટરનો કોન્ટેક્ટ કરવા પોતાના કમ્પ્યુટરને પણ ઓપરેટ કરવાની સ્થિતિમાં નહોતી રહી.

સેલ્ફ આઈસોલેશન શરુ કરી દીધું

આટલી તકલીફો પડી રહી હોવા છતાં ફિઓના હોસ્પિટલ જવા નહોતી ઈચ્છતી. તેણે હોસ્પિટલમાં ફોન કર્યો ત્યારે તેને કહેવાયું કે જેમને કોરોનાના લક્ષણો છે તે લોકો હાલ ઘરે જ રહે. તેને ઘરની બહાર ના નીકળવા અને કોઈપણ વ્યક્તિના સંપર્કમાં ના આવવા માટે સ્પષ્ટ સૂચના આપવામાં આવી. ફિઓનાએ પોતે પણ આ વાયરસની શક્ય હોય તેટલી માહિતી લઈ તેનો ચેપ બીજાને ના લાગે તે માટે પૂરતી કાળજી લેવાનું શરુ કર્યું.

એક સમયે તેને એવો ડર પણ લાગ્યો કે તેને હાલ જે થઈ રહ્યું છે તે જો કોરોનાના કારણે નહીં થઈ રહ્યું હોય તો હોસ્પિટલ જઈને કદાચ તેને બીજાનો ચેપ લાગી શકે છે. તેને પણ એમ હતું કે તેની ઉંમર ખૂબ નાની છે, અને તે એકદમ ફિટ છે જેથી તેને કોરોનાનો ચેપ ના લાગ્યો હોઈ શકે. હાલ જે તકલીફ થઈ રહી છે તે થોડા સમયમાં કદાચ જાતે જ ઠીક થઈ જશે.

જોકે, ફિઓના ધારી રહી હતી તેવું કશુંય થયું નહીં અને આખરે તેને હોસ્પિટલ જવું જ પડ્યું. તેના લક્ષણો જોઈ ડોક્ટર્સ તરત જ સમજી ગયા કે તેને કોરોનાનો ચેપ લાગ્યો છે. તેને કહેવાયું કે તેના બાજુના રુમમાં જ 30 વર્ષના એક યુવકને દાખલ કરાયો છે. તે આમ તો હેલ્ધી છે, પરંતુ તેને પણ શ્વાસ લેવામાં તકલીફ પડી રહી છે.

વધુને વધુ યુવાનો બની રહ્યા છે દર્દી

હોસ્પિટલના સ્ટાફ પાસેથી તેને જાણવા મળ્યું કે તેના જેટલી ઉંમરના વધુને વધુ લોકો આ તકલીફ સાથે હોસ્પિટલમાં એડમિટ થઈ રહયા છે. હોસ્પિટલમાં ફિઓનાને ઓક્સિજન ટ્યૂબ લગાવવામાં આવી, અને તેને રાહત મહેસૂસ થઈ. તેને એમ પણ કહેવામાં આવ્યું કે તેણે યોગ્ય સમયે હોસ્પિટલ પહોંચીને સારું કર્યું. જો તે હજુય ઘરે જ રહી હોત તો તેની સ્થિતિ ખૂબ જ ગંભીર થઈ ગઈ હોત.

Covid 19ને જરાય હળવાશમાં ના લેશો

પોતાની સાથે જે થયું તેના પછી ફિઓના તેના જેવા યુવાન અને પોતાને ફિટ સમજનારા લોકોને સલાહ આપી રહી છે કે Covid-19ને હળવાશથી લેવાની ભૂલ ક્યારેય ના કરશો. તેનું કહેવું છે કે તમે બીજું કંઈ ના કરો તો કમ સે કમ લોકડાઉન દરમિયાન ઘરમાં તો રહી જ શકો. આમ કરીને તમે માત્ર તમારી જ નહીં, બીજાની પણ આ વાયરસથી રક્ષા કરી શકો છો.

અમેરિકામાં 40 ટકા કન્ફર્મ કેસ 54 વર્ષથી નીચેની વયના

ભારતમાં મોટાભાગના લોકોને એવો વહેમ છે કે 60 વર્ષથી ઉપરના લોકોને જ કોરોનાની ગંભીર અસર થાય છે. જ્યારે યુવાનોને તેનો ચેપ લાગી પણ જાય તો પણ તેઓ ઝડપથી સાજા થઈ જાય છે. જોકે, ન્યૂયોર્ક ટાઈમ્સના અહેવાલ અનુસાર, દુનિયામાં સૌથી સૌથી વધુ કન્ફર્મ કેસ ધરાવતા અમેરિકામાં 40 ટકા દર્દીઓ 54 વર્ષથી નીચેની વયના છે. કેટલાક દેશોમાં તો સ્થિતિ એટલી બદતર છે કે ડોક્ટરો કોણ બચી શકે તેમ છે અને કોણ બચી શકે તેમ નથી તે નક્કી કરી પેશન્ટની ટ્રીટમેન્ટ કરે છે.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..